ພາກວິຊາສັດຕະວະແພດ ແມ່ນສັງກັດຢູ່ໃນການຈັດຕັ້ງຄະນະກະເສດສາດ (ວິທະຍາເຂດນາບົງ) ມະຫາວິທະຍາໄລແຫ່ງຊາດ. ມີພາລະບົດບາດ ແລະ ໜ້າທີ່ໃນການພັດທະນາຊັບພະຍາກອນມະນຸດ ໃຫ້ກາຍເປັນນັກວິຊາການສະເພາະດ້ານທາງດ້ານສັດຕະວະແພດ ເພື່ອນຳໃຊ້ຄວາມຮູ້ຄວາມສາມາດທີ່ຮຽນເຊັ່ນ: ການຮັກສາດູແລສຸຂະພາບຂອງສັດລ້ຽງ, ການປ້ອງກັນພະຍາດ ການປິ່ນປົວ ແລະ ຮັກສາພະຍາດທີ່ເກີດຈາກສັດ ແລະ ການເຝົ້າລະວັງການລະບາດຂອງເຊື້ອພະຍະຍາດ ແລະ ຍັງໄດ້ບໍລິການໂຮງໝໍປິ່ນປົວສັດລ້ຽງໃຫ້ບໍລິການແກ່ສັງຄົມ  ແລະ ພ້ອມດຽວກັນນັ້ນຍັງໄດ້ມີການຮ່ວມມືກັບສາກົນ ເຮັດການຄົ້ນຄວ້າວິໄຈ ກ່ຽວກັບພະຍາດຈາກສັດສູ່ຄົນ

ສັດຕະວະແພດ (Veterinary)

ອີງຕາມ ມາດຕາ 3 ກົດໝາຍວ່າດ້ວຍການລ້ຽງສັດ ແລະ ການສັດຕະວະແພດ ສະບັບປັບປຸງ

ການສັດຕະວະແພດ: ແມ່ນການນຳໃຊ້ວິທະຍາສາດດ້ານການແພດກ່ຽວກັບສັດເຂົ້າໃນວຽກງານຮັກສາສຸຂະພາບສັດ ເປັນຕົ້ນ ການກວດສຸຂະພາບສັດ, ການບົ່ງມະຕິພະຍາດສັດ, ແລະປິ່ນປົວສັດລ້ຽງ, ສັດນ້ຳ ແລະສັດປ່າ, ການກັນ ແລະຄວບຄຸມພະຍາດສັດຕິດຕໍ່ຈາກສັດສູ່ສັດ, ລວມທັງພະຍາດສັດຕິດຕໍ່ສູ່ຄົນ, ສະຫວັດດີການສັດ, ການກວດຄຸນນະພາບ ແລະຄວາມປອດໄພທາງດ້ານອາຫານໃຫ້ແກ່ຜູ້ບໍລິໂພກ ຕາມລະບົບຕ່ອງໂສ້ຂອງການຜະລິດສັດ, ຈຳໜ່າຍ ແລະ ການນຳໃຊ້ຜະລິດຕະພັນສິນຄ້າກ່ຽວກັບສັດ ລວມທັງຄຸ້ມຄອງວິຊາຊີບລ້ຽງສັດ ແລະ ສັດຕະວະແພດ,

ວິໄສທັດ (VISION)
ພາກວິຊາສັດຕະວະແພດເປັນສະຖາບັນການສຶກສາຊັ້ນສູງທາງດ້ານສັດຕະວະແພດທີ່ນຳໜ້າຢູ່ສປປລາວ, ສ້າງປະໂຫຍດແກ່ສັງຄົມ ໃຫ້ໃກ້ຄຽງກັບລະດັບພາກພື້້ນ ແລະ ສາກົນ.

ພະລະກິດ (MISSION)
1. ສະໜອງການສຶກສາລະດັບປະລິນຍາຕີ ແລະ ພັດທະນາຊັບພະຍາກອນມະນຸດໃນສາຂາສັດຕະວະແພດ ຕອບສະໜອງປະລິມານ ແລະ ຄຸນນະພາບໃຫ້ແກ່ສັງຄົມ
2. ຈັດຕັ້ງການຄົ້ນຄວ້າວິທະຍາສາດທາງດ້ານສັດຕະວະແພດ ແລະ ເຜີຍແຜ່ຜົນງານການຄົ້ນຄວ້າວິທະຍາສາດ ທີ່ມີຜົນປະໂຫຍດແກ່ການພັດທະນາເສດຖະກິດສັງຄົມ
3. ຈັດຕັ້ງການບໍລິການທາງດ້ານວິຊາການໃຫ້ແກ່ສັງຄົມ
4. ປົກປັກຮັກສາ ແລະ ເສີມຂະຫຍາຍສິລະປະ ວັດທະນະທຳ ແລະ ຮີດຄອງປະເພນີອັນດີງາມຂອງຊາດ ຂອງປະຊາຊົນບັນດາເຜົ່າຄຽງຄູ່ໄປກັນການຮຽນຮູ້ແລກປ່ຽນ ແລະ ຮັບເອົາວັດທະນາທຳສາກົນຢ່າງມີການເລືອກເຟັ້ນ
5. ປະຕິບັດພາລະໜ້າທີ່ອື່ນໆຕາມການມອບໝາຍຂອງ ຄະນະກະເສດສາດ, ມະຫາວິທະຍາໄລແຫ່ງຊາດ, ກະຊວງສຶກສາທິການ ແລະ ກິລາ ແລະ ລັດຖະບານ