ຄກສ.ຕ້ອນຮັບການມາທັດສະນະສຶກສາ ຂອງ ຄະນະກະເສດສາດແລະຊັບພະຍາກອນປ່າໄມ້, ມະຫາວິທະຍາໄລສຸພານຸວົງ

ໃນຕອນເຊົ້າຂອງວັນທີ 12/2/2018 ຄະນະກະເສດສາດ (ກະເສດນາບົງ), ພາກວິຊາລ້ຽງສັດ-ການປະມົງ ໄດ້ຕ້ອນຮັບການມາທັດສະນະສຶກສາ ຂອງຄະນະອາຈານແລະນັກສຶກສາ ຈຳນວນ 37 ທ່ານ ຈາກຄະນະກະເສດສາດ ແລະ ຊັບພະຍາກອນປ່າໄມ້, ພາກວິຊາວິທະຍາສາດສັດ, ມະຫາວິທະຍາໄລສຸພານຸວົງ. ເປັນກຽດກ່າວຕ້ອນຮັບໂດຍທ່ານ ຮສ ສົມພັນ ປາຊູວ່າງ ຮອງຄະນະບໍດີ, ຄະນະກະເສດສາດ; ທ່ານ ຮສ. ທອງຫຼອມ ພົມມະວົງ, ຫົວໜ້າພາກວິຊາລ້ຽງສັດ-ການປະມົງ ການມາຢ້ຽມຢາມຄັ້ງນີ້ອາຈານແລະນັກສຶກສາທັງສອງ ສະຖາບັນໄດ້ມີການແລກປ່ຽນບົດຮຽນທາງດ້ານວິຊາການລ້ຽງສັດ ແລະ ໄດ້ເຂົ້າຢ້ຽມຊົມສະຖານທີ່ຄົ້ນຄວ້າທົດລອງ ເຊັ່ນ: ຟາມວິໄຈແລະພັດທະນາການລ້ຽງງົວ, ຟາມທົດລອງການລ້ຽງໝູພື້ນເມືອງລາວ ແລະ ສວນພືດອາຫານສັດ ເພື່ອນຳບົດ ຮຽນດັ່ງກ່າວໄປນຳໃຊ້ ແລະ ຮ່ວມມືກັນທາງດ້ານການຄົ້ນຄວ້າທົດລອງທາງດ້ານວິທະຍາສາດສັດໃນຕໍ່ໜ້າ.

_{ລາຍງານໂດຍ: ວ.ນະວັດຕະກຳ}

ສຳມະນາວິຊການສາກົນ ວ່າດ້ວຍ: ຄຸນນະພາບຊີວິດ ແລະ ການພັດທະນາການຜະລິດກະສິກຳ “ Life Quality and Agricultural Production Development”

ໃນວັນທີ 19/1/2018 ທີ່ຜ່ານມານີ້ ຄະນະກະເສດສາດ, ມະຫາວິທະຍາໄລແຫ່ງຊາດ ໄດ້ຈັດສຳມະນາວິຊາການສາກົນ ຮ່ວມກັບ ມະຫາວິທະຍາໄລແຫ່ງຊາດເຊອຸນ, ສ.ເກົາຫຼີ ຂຶ້ນທີ່ຫ້ອງປະຊຸມໃຫຍ່ຂອງຄະນະກະເສດສາດ ໂດຍການເປັນປະທານຂອງ ທ່ານ ຮສ.ຟອງສະມຸດ ສຸທຳມະວົງມ ຄະນະບໍດີ ຄະນະກະເສດສາດ ແລະ ທ່ານ ປອ.ມີຊັນ ປາກ (Dr. Misun Park) ແລະ ປອ. ທີຢຸນ ຄິມ (Dr. Taeyoon Kim) ຈາກ ສະຖາບັນພັັດນາຊຸມຊົນສາກົນ, ມະຫາວິທະຍາໄລແຫ່ງຊາດເຊອຸນ ສ.ເກົາຫຼີ, ຈຸດປະສົງກໍ່ເພື່ອ ເພີ່ມທະວີຄວາມຮ່ວມມືແລະຄວາມສາມາດທາງດ້ານວິຊາການແກ່ບັນດາອາຈານ, ພະນັກງານ ແລະ ນັກສຶກສາ ທັງສອງສະຖາບັນ ເຊິ່ງສຳມະນານີ້ລວມມີຜູ້ນຳສະເໜີຜົນງານຄົ້ນຄວ້າຈຳນວນ 5 ເລື່ອງ ທີ່ກ່ຽວຂ້ອງກັບດ້ານການພັດທະນາຊຸມຊົນແລະການຜະລິດກະສິກຳປູກຝັງ-ລ້ຽງສັດ ທັງກໍລະນີສຶກສາໃນ ສປປ ລາວ ແລະ ສ.ເກົາຫຼີ ແລະ ມີບັນດາອາຈານ, ພະນັກງານ, ນັກສຶກສາ ຂອງທັງສອງສະຖາບັນເຂົ້າຮ່ວມຈໍານວນ 65 ທ່ານ ໃນນັ້ນ ຈາກ ສ.ເກົາຫຼີຈຳນວນ 25 ທ່ານ, ເຊິ່ງບັນຍາກາດສຳມະນາຄັ້ງນີ້ໄດ້ດຳເນີນໄປຢ່າງຟົດຟື້ນແລະອົບອຸ່ນ.

          ນອກຈາກນີ້ທ່ານ ປອ.ມີຊັນ ປາກ ແລະ ທີມງານກໍ່ຍັງໄດ້ລົງຢ້ຽມຢາມຟາມວິໄຈແລະພັດທະນາການລ້ຽງສັດ ແລະ ຫ້ອງທົດລອງຕ່າງໆ ຂອງຄະນະກະເສດສາດ ໂດຍການນຳພາຂອງ ອຈ.ປອ.ວຽງສະກຸນ ນາປະເສີດ ຮອງຫົວໜ້າພາກວິຊາລ້ຽງສັດແລະການປະມົງ, ຄະນະກະເສດສາດ, ມະຫາວິທະຍາໄລແຫ່ງຊາດ.

ລາຍງານໂດຍ: ວ.ນະວັດຕະກຳ

ຊົມເຊີຍວັນສ້າງຕັ້ງສະຫະພັນກຳມະບານລາວ ຄົບຮອບ 62ປີ

ໃນວັນທີ 30 ມັງກອນ 2018 ທີ່ຜ່ານມານີ້ ພາກວິຊາລ້ຽງສັດແລະການປະມົງໄດ້ເຮັດກິດຈະກຳ ອອກແຮງງານລວມເພື່ອຂຳນັບຮັບຕ້ອນ ວັນສ້າງຕັ້ງສະຫະພັນກຳມະບານລາວ ຄົບຮອບ 62ປີ ໂດຍປຸກເຮືອນພັກ ພະນັກງານແລະນັກສຶກສາ ທີ່ ຟາມວິໄຈແລະພັດທະນາການລ້ຽງສັດ ຄກສ. ຊຶ່ງນຳພາໂດຍ ຮສ.ທອງຫຼອມ ພົມມະວົງ ຫົວໜ້າພາກວິຊາ ແລະ ຮອງພາກວິຊາທັງສອງທ່ານ ອຈ.ປອ.ພູວິນ ພູສະຫວັນ ແລະ ອຈ.ປອ.ວຽງສະກຸນ ນາປະເສີດ ຮ່ວມກັບບັນດາອາຈານ-ພະນັກງານ ແລະນັກສຶກສາພາກວິຊາລ້ຽງສັດແລະການປະມົງ ຊຶ່ງໃນນີ້ລວມມີຈຳນວນພົນເຂົ້າຮ່ວມ ທັງໝົດ ເກືອບ 50 ຄົນ ແລະບັນຍາກາດເຕັມໄປດ້ວຍຄວາມເບີກບານ ມ່ວນຊື່ນ ສະແດງອອກເຖິງຄວາມສາມັກຄີ ຂອງບັນດາອາຈານ, ພະນັກງານ ແລະນັກສຶກສາ.

ລາຍງານໂດຍ: ວ.ນະວັດຕະກຳ

ຄວາມຮ່ວມມືລະຫວ່າງ ມະຫາວິທະຍາໄລແຫ່ງຊາດລາວ ແລະ ມະຫາວິທະຍາໄລແຫ່ງຊາດເຊອຸນ

ການຮ່ວມມື ເພື່ອການພັດທະນາລະຫວ່າງ ມະຫາວິທະຍາໄລແຫ່ງຊາດລາວ ສປປ ລາວ ແລະ ມະຫາວິທະຍາໄລແຫ່ງຊາດເຊອຸນ ສາທາລະນະລັດ ເກົາຫຼີ, ໂດຍຝ່າຍລາວ ມອບໃຫ້ ຄະນະກະເສດສາດ (FAG), ມະຫາວິທະຍາໄລແຫ່ງຊາດ (NUOL) ເປັນຄູ່ຈັດຕັ້ງປະຕິບັດ ແລະ ຝ່າຍ ສ.ເກົາຫຼີ ແມ່ນ ສະຖາບັນພັດທະນາຊຸມຊົນນານາຊາດ (SNUSR), ໂດຍຜ່ານ ອາສາສະໝັກຂອງນັກສຶກສາທັງສອງສະຖາບັນ ໃນຊ່ວງວັນທີ 17-25 ມັງກອນ 2018, ຈຸດປະສົງເພື່ອ ເປັນການແລກປ່ຽນປະສົບການ, ເສີມສ້າງຄວາມສາມັກຄີ ໃນວຽກງານພັດທະນາຊຸມຊົນ, ແລກປ່ຽນຜົນງານການຄົ້ນຄວ້າວິທະຍາສາດ, ວັດທະນະທຳຂອງທັງສອງສະຖາບັນ, ນອກຈາກນັ້ນຍັງມີກິດຈະກໍາຮ່ວມກັບນ້ອງນັກຮຽນ ໂຮງຮຽນປະຖົມບ້ານປາກຊາບໃໝ່, ເມືອງໄຊທານີ, ນະຄອນຫຼວງວຽງຈັນ ຊຶ່ງລວມມີກິດຈະກຳພັດທະນາທາງດ້ານ ສຸຂະອານາໄມ, ວິທະຍາສາດ-ເຕັກໂນໂລຊີ, ການຮັກສາສິ່ງແວດລ້ອມ, ສີລະປະ, ກິລາ-ວັດທະນະທຳ ແລະອື່ນໆ, ໂດຍນຳພານ້ອງນັກສຶກສາປະຖົມ ລ້າງມື-ຖູແຂ້ວ ໃຫ້ຖຶກສຸຂະອານາໄມ, ສອນໃຫ້ຮູ້ເຖິງຄວາມສຳຄັນຂອງນົມ ແລະ ການດື່ມນົມ, ປູກຕົ້ນໄມ້, ເກັບແລະແຍກຂີ້ເຍື້ອ, ທາສີ-ສ້ອມແປງໂຮງຮຽນ ແລະອື່ນໆ.

          ເຖິງແມ່ນວ່າກິດຈະກຳດັ່ງກ່າວຈະເປັນການລິເລີ່ມກັບບາງໂຮງຮຽນກໍ່ຕາມ ແຕ່ມັນກໍ່ເປັນການຢັ້ງຢືນ ເຖິງໝາກຜົນທີ່ດີຂອງການຮ່ວມມືດ້ານການສຶກສາ ລະຫວ່າງ ສອງມະຫາວິທະຍາໄລ, ເພື່ອເປັນການເສີມຂະຫຍາຍອອກໄປຢ່າງກວ້າງຂວາງຕື່ມ ທັງສອງຝ່າຍຍັງຈະຕ້ອງໄດ້ຮ່ວມມືກັນພັດທະນາ ເພື່ອເຮັດໃຫ້ກິດຈະກຳດັ່ງກ່າວມີຄວາມຍືນຍົງ ແລະ ໃຫ້ສອດຄ່ອງກັບນະໂຍບາຍຂອງລັດຖະບານລາວ ທີ່ຕ້ອງການໃຫ້ເດັກນ້ອຍລາວໄດ້ບໍລິໂພກນົມໃຫ້ສົມກັບວ່າ ນົມດີເພື່ອເດັກນ້ອຍລາວ.

ລາຍງານໂດຍ: ວຽງສະກຸນ ນາປະເສີດ