ຄະນະກະເສດສາດ, ມະຫາວິທະຍາໄລແຫ່ງຊາດ ໄດ້ຈັດຝຶກອົບຮົມໃນຫົວຂໍ້ ການລ້ຽງງົວ-ຄວາຍ ຢ່າງມືອາຊີບ (ລຸ້ນທີ1) ຂຶ້ນທີ່ຟາມວິໃຈ ແລະ ພັດທະນາການລ້ຽງສັດ. ຄກສ. ມຊ. ໃນວັນທີ 29/11/2018-2/11/2018 ຜ່ານມານີ້, ສຳມະນາກອນລວມມີພະນັກງານວິຊາການ ຈາກວິທະຍາໄລກະສິກຳ-ປ່າໄມ້ ແຂວງບໍລິຄຳໄຊ ແລະ ຊາວກະສິກອນເມືອງສັງທອງ, ແຂວງນະຄອນຫຼວງວຽງຈັນ. ໂດຍການເປັນປະທານເປີດງານໃນຄັ້ງນີ້ແມ່ນ ທ່ານ ຮສ ຟອງສະມຸດ ສຸທຳມະວົງ, ຄະນະບໍດີ ຄະນະກະເສດສາດ, ທ່ານໄດ້ກ່າວຈຸດປະສົງການຝຶກອົບຮົມ ແລະ ເປີດພິທີຢ່າງເປັນທາງການ ເຊິ່ງການອົບຮົມຄັ້ງນີ້ເປັນຄັ້ງທຳອິດ ທີ່ເປີດຢູ່ຄະນະກະເສດສາດກ່ຽວກັບຫົວຂໍ້ ດັ່ງກ່າວ.
ທ່ານ ປອ. ວຽງສະກຸນ ນາປະເສີດ (ຜູ່ຮັບຜິດຊອບຫຼັກສູດ) ໄດ້ກ່າວສະເໜີຫຼັກສູດການຝຶກອົບຮົມ ແລະ ຄູຝຶກ, ການຝຶກອົບຮົມປະກອບ ດ້ວຍ 3 ຫຼັກສູດໄດ້ແກ່: 1. ອາຫານສັດ ແລະ ການຈັດການ, 2. ພືດອາຫານສັດ ແລະ ການຈັດການ, 3. ການທອມ, ການໃຫ້ອາຫານ, ການຈັດການສັດເຂົ້າທອມ (ຂຸນ) ແລະ ການຮັກສາສຸຂະພາບ-ການປ້ອງກັນສັດລ້ຽງ. ເຊີ່ງແຕ່ລະຫຼັກສູດແມ່ນ ຈະໄດ້ຮຽນທິດສະດີຄວບຄູ່ພາກປະຕິບັດຕົວຈິງໄປພ້ອມໆກັນເຊັ່ນ: ການປູກພືດອາຫານສັດ, ການບົວລະບັດຮັກສາ, ການເກັບກ່ຽວ, ການປຸງແຕ່ງ, ການເຮັດໝັກ, ການປະສົມອາຫານເພື່ອລ້ຽງ ແລະ ທອມ, ການຄັດເລືອກສັດເພື່ອລ້ຽງ-ທອມ, ລວມທັງການເບິ່ງແຍງ-ຮັກສາສຸຂະພາບເປັນຕົ້ນ ເຊິ່ງຫຼັກສູດດັ່ງກ່າວນີ້ມີຈຸດປະສົງເພື່ອແນ່ໃສຖ່າຍທອດປະສົບການ ແລະ ຜົນການຄົ້ນຄວ້າ ຂອງບັນດາຄູ-ອາຈານ ຄກສ. ສູ່ຊາວກະສິກອນ, ຜູ່ປະກອບອາຊີບການລ້ຽງງົວ-ຄວາຍ ລວມທັງນັກວິຊາການ ເນັ້ນພັດທະນາການລ້ຽງງົວໃນສະພາບການຂອງ ສປປ ລາວ ໃຫ້ມີປະສິດທິພາບຫຼາຍຂຶ້ນ. ໄລຍະເປີດຝຶກອົບຮົມປີລະ 4.
ໃນຕອນທ້າຍຂອງການຝຶກອົບ, ທ່ານ ຮສ. ຟອງສະມຸດ ສຸທຳມະວົງ, ຄະນະບໍດີ, ຄະນະກະເສດສາດໃຫ້ຄຳເຫັນ ແລະ ໄດ້ມອບໃບຢັ້ງຢືນການຝຶກອົບຮົມ ໃຫ້ສຳມະນາກອນ ແລະ ປິດພິທີຢ່າງເປັນທາງການ.
ລາຍງານໂດຍ: ວ.ຊະນະ