ໃນຊ່ວງວັນທີ 27-29 ມີຖຸນາ 2018 ນີ້ ຄະນະກະເສດສາດໄດ້ສົ່ງນັກສຶກສາຈໍານວນ 8 ນ້ອງ ໄປຮ່ວມແຂ່ງຂັນ​ທັກ​ສະວິທະຍາສາດສັດອາຊຽນຄັ້ງ​ທີ 3 ແລະ ການ​ແຂ່ງ​ຂັນ​ທາງວິທະຍາສາດກະສິກຳ​ອາ​ຊຽນ​ຄັ້ງ​ທີ 1 ທີ່ນະຄອນຣາຊະສີມາ, ປະເທດໄທ ໂດຍການເປັນເຈົ້າພາບຂອງ ມະຫາວິທະຍາໄລຣາຊະມັງຄະລາເຕັກໂນໂລຊີອີສານ (Rajamagala University of Technology Isan, RMUTI) ໂດຍການນໍາພາຂອງ ອຈ.ປອ.ວຽງສະກຸນ ນາປະເສີດ, ອາຈານ ສົມສະໜຸກ ພອນປະດິດ ແລະ ອາຈານ ໄຊຊະນະ ປັນຍາວົງ. ຈຸດປະສົງຂອງການຈັດການແຂ່ງຂັນນີ້ ນອກຈາກຈະເປັນເວທີການສະແດງອອກທາງດ້ານທິດສະດີ, ທັກສະທີ່ຜ່ານການປະຕິບັດໂຕຈິງແລ້ວ ຍັງເປັນເວທີໃນການຮ່ວມມື-ແລກປ່ຽນຮຽນຮູ້ລະຫວ່າງນັກສຶກສາ, ອາຈານ ຂອງແຕ່ລະສະຖາບັນ ໃນ 4 ປະເທດຄື: ໄທ, ຫວຽດນາມ, ກໍາປູເຈຍ ແລະ ສປປ ລາວ, ການແຂ່ງຂັນຄັ້ງນີ້ປະກອບດ້ວຍ 12 ມະຫາວິທະຍາໄລ ແລະ ​ມີ​ພະ​ນັກງານ, ອາ​ຈານ, ນັກ​ສຶກ​ສາ​ ເຂົ້າ​ຮ່ວມ​ທັງ​ໝົດ 330 ຄົນ​; ມີ​ການ​ແຂ່ງ​ຂັນທັກສະກະສິກຳ ດ້ານການປູກຝັງ, ລ້ຽງສັດ, ສັດຕະວະແພດ, ການແປຮູບອາຫານ ທັງ​ໝົດ 16 ທັກສະ ໃນ​ນັ້ນ​ທີມ​ນັກ​ສຶກ​ສາ​ລາວ​ຍາດ​ມາ​ໄດ້ລວມ 5 ຫຼຽນ​ຄື: 2 ຫຼຽນ​ຄຳ, 2 ຫຼຽນ​ເງິນ, 1 ຫຼຽນ​ທອງ​ແດງ ແລະ 3 ລາງວັນ​ຊົມ​ເຊີຍ ລາຍ​ລະ​ອຽດ​ດັ່ງຕາຕະລາງຂ້າງລຸ່ມນັ້ນ.

ຫຼັງຈາກທີມນັກສຶກສາແລະອາຈານນຳມາກັບຈາກການແຂ່ງຂັນທີ່ປະເທດໄທແລ້ວ ໃນວັນທີ 4/7/2018 ທາງອົງການຈັດຕັ້ງ-ການນຳ ຄກສ. ກໍ່ໄດ້ຈັດຕັ້ງພິທີຊົມເຊີຍແລະມອບໃບຍ້ອງຍໍໃຫ້ແກ່ ບັນດານັກສຶກສາ, ອາຈານນຳພາ, ອາຈານຄູຝຶກ ແລະ ຄະນະຊີ້ນຳ ຢ່າງສົມກຽດ ໂດຍໃຫ້ກຽດເປັນປະທານມອບໃບຍ້ອງຍໍແມ່ນ ຮສ.ຟອງສະມຸດ ສຸທຳມະວົງ ຄະນະບໍດີຄະນະກະເສດສາດ

.

ຮູບພາບແລະວີທີທັດປະກອບ:

1. https://www.facebook.com/viengsakoun.napasirth.7/media_set?set=a.10212294563102812.1073742018.1340781816&type=3
2. https://drive.google.com/drive/folders/1ahiHSz59V7nPa0SMq5U0eTuEyqzg5F7_
3. https://youtu.be/MDYdGZM2iEE

ລາຍງານໂດຍ: ວ.ຊະນະ

ເພື່ອເປັນການສ້າງຂະບວນການຂໍ່ານັບ-ຮັບຕ້ອນວັນສໍາຄັນຂອງພັກ ຂອງຊາດເວົ້າລວມ; ເວົ້າສະເພາະວັນຄ້າຍວັນເກີດຂອງທ່ານປະທານ ສຸພານຸວົງ ຄົບຮອບ109 ປີ ແລະເຫັນໄດ້ຄວາມສຳຄັນຂອງວຽກງານ ການອະນຸລັກຮັກສາສັດນໍ້າ-ສັດປ່າ ທັງເປັນການເພີ່ມພູນສັດນໍ້າຄືນສູ່ທຳມະຊາດໃຫ້ຫຼາຍຂຶ້ນ, ໃນຕອນບ່າຍ ວັນທີ 13 ກໍລະກົດ 2018ນີ້, ມະຫາວິທະຍາໄລແຫ່ງຊາດ ໄດ້ຈັດພິທີປ່ອຍປາ, ໂດຍການເຂົ້າຮ່ວມຂອງ ທ່ານ ບຸນມີ ພຸດມະວົງ ຮອງລັດຖະມົນຕີ ກະຊວງຊັບພະຍາກອນທໍາມະຊາດ ແລະສິ່ງແວດລ້ອມ, ທ່ານ ສຈ.ປອ ສົມສີ ຍໍພັນໄຊ ວ່າການອະທິການບໍດີມະຫາວິທະຍາໄລແຫ່ງຊາດ, ທ່ານ ຮສ. ຟອງສະໝຸດ ສຸທຳມະວົງ ຄະນະບໍດີ ຄະນະກະເສດສາດ, ມີຫົວໜ້າຫ້ອງການ, ຜູ້ອໍານວຍການສະຖາບັນ, ສູນ, ຫໍສະໝຸດກາງ, ໂຮງໝໍ, ໂຮງຮຽນ, ນາຍບ້ານອ້ອມຂ້າງ ພ້ອມດ້ວຍພະນັກງານ, ຄູ-ອາຈານ ແລະນັກສຶກສາ ເຂົ້າຮ່ວມ.

         ໃນໂອກາດນີ້, ທ່ານ ສຈ. ປອ. ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ ໄດ້ກ່າວເປີດພິທີ, ທ່ານກ່າວບາງຕອນວ່າ: ເພື່ອສ້າງຂະບວນການຕ້ອນຮັບວັນສໍາຄັນຂອງຊາດ ເວົ້າລວມ, ເວົ້າສະເພາະ ກໍຄືວັນປ່ອຍປາ ແລະອະນຸລັກສັດນໍ້າ-ສັດປ່າແຫ່ງຊາດ ແລະເພື່ອປະຕິບັດຕາມເນື້ອໃນກົດໝາຍວ່າດ້ວຍ ສັດນໍ້າ-ສັດປ່າ ສະບັບເລກທີ 07/ສພຊ, ລົງວັນທີ 24 ໃນພາກທີ 7 ມາດຕາ 64 ວ່າດ້ວຍການປ່ອຍປາ ແລະອະນຸລັກສັດນໍ້າ-ສັດປ່າແຫ່ງຊາດ ທັງເປັນວັນຄ້າຍວັນເກີດ ຂອງທ່ານ ປະທານ ສຸພານຸວົງ ຄົບຮອບ 109 ປີ. ມະຫາວິທະຍາໄລແຫ່ງຊາດ ໄດ້ໃຫ້ຄວາມສໍາຄັນຕໍ່ການປົກປັກຮັກສາສິ່ງແວດລ້ອມ, ການອະນຸລັກຊີວະນາໆພັນ ກໍຄືການອະນຸລັກສັດນໍ້າ-ສັດປ່າ ທີ່ເປັນມໍລະດົກຂອງຊາດ ສະນັ້ນ; ຈຶ່ງຈໍາເປັນປົກປ້ອງລະບົບນິເວດ ຂອງລາວໃຫ້ຍືນຍົງ ແລະຕິດພັນກັບການຜູກຈິດສໍານຶກໃຫ້ຊາວໜຸ່ມ, ເຍົາວະຊົນໃຫ້ເຂົ້າໃຈ ແລະເຫັນຄວາມໝາຍ-ຄວາມສໍາຄັນຂອງສັດນໍ້າ-ສັດປ່າທີ່ມີຕໍ່ຄົນເຮົາ.

ຄະ​ນະ​ກະ​ເສດ​ສາດ. ມະ​ຫາ​ວິ​ທະ​ຍາ​ໄລ​ແຫ່ງ​ຊາດ. ສະຫຼຸບ​ຜົນ​ການແລກ​ປ່ຽນ​ຝຶກງານ​ຂອງ​ນັກ​ສຶກ​ສາ ຈາກ ມະຫາວິທະຍາໄລ ຣາຊະພັດພິບູນສົງຄາມ, ແຂວງພິດສະນຸໂລກ, ປະເທດໄທ