ໃນຕອນບ່າຍຂອງວັນທີ 6/03/2018 ຜ່ານມານີ້, ພາກວິຊາລ້ຽງສັດ ແລະ ການປະມົງ, ຄະນະກະເສດສາດ, ມະຫາວິທະຍາໄລແຫ່ງຊາດ ໄດ້ຈັດກິດຈະກຳອອກແຮງງານສາມັກຄີສ້າງຄວາມສຳພັນລະຫວ່າງອາຈານ ແລະ ນັກສຶກສາພາຍໃນພາກ ເພື່ອຕ້ອນຮັບວັນແມ່ຍິງສາກົນຄົບຮອບ 108 ປີ ທີ່ຟາມລ້ຽງງົວຂອງຄະນະກະເສດ, ໂດຍການເປັນປະທານຂອງ ທ່ານ ຮສ ທອງຫຼອມ ພົມມະວົງ ຫົວໜ້າພາກວິຊາລ້ຽງ ແລະ ການປະມົງ, ຄກສ, ມຊ ແລະ ມີອາຈານ, ນັກສຶກສາພາຍໃນພາກວິຊາລ້ຽງສັດ ແລະ ການປະມົງເຂົ້າຮ່ວມຈຳນວນ 143 ຄົນເຂົ້າຮ່ວມ., ໃນນັ້ນມີອາຈານຈຳນວນ 16 ທ່ານ, ຍິງ 6 ທ່ານ ແລະ ນັກສຶກສາປະລິນຍາຕີ, ຕໍ່ເນື່ອງ ປີ 1 ຮອດ ປີ 4 ຈຳນວນ 127 ຄົນ, ຍິງ 46 ຄົນເຂົ້າຮ່ວມ.
ໂອກາດນີ້ ທ່ານ ຮສ ທອງຫຼອມ ພົມມະວົງ ໄດ້ໃຫ້ກຽດກ້າວເປີດພິທີ, ທ່ານກ່າວບາງຕອນວ່າ: ພາກລ້ຽງສັດ ແລະ ການປະມົງຂອງພວກເຮົາໄດ້ຈັດກິດຈະແບບນີ້ຂຶ້ນທຸກໆປີ ຈຸດປະສົງກໍ່ເພື່ອຕ້ອນຮັບວັນແມ່ຍິງສາກົນຄົບຮອບ 108 ທີ່ຈະມາຮອດນີ້ ແລະ ປີນີ້ກໍ່ເປັນປີທີ່ພິເສດກວ່າປີທີ່ຜ່ານມາ ສະນັ້ນຈຶ່ງຮຽກຮ້ອງໃຫ້ນັກສຶກສາທຸກຊັ້ນຮຽນໃຫ້ເອົາໃຈໃສ່ ສ້າງຂະບວນການໃນມື້ນີ້ໃຫ້ຟົດຟື້ນ ແລະ ມີຄວາມສາມັກຄີຢ່າງພ້ອມພຽງ.
ໃນກິດຈະກຳ ທ່ານ ອາຈານ ເພັດສົມພູ ໄດ້ກ່າວແບ່ງໜ້າວຽກໃຫ້ນັກສຶກສາ ໂດຍການຈັດແບ່ງເປັນຕອນ 2 ຄົນ/3 ແມັດ ໃຫ້ສຳເລັດ, ນັກສຶກສາ ແລະ ອາຈານຕ່າງກໍ່ພາກັບອອກແຮງງານຢ່າງຫ່າວຫັນ. ຜ່ານການອອກແຮງງານສາມັກຄີ ເຫັນໄດ້ວ່າສາມາດຖາງປ່າແລວຮົ້ວໄດ້ 200 ກວ່າແມັດ ຕາມທີ່ຄາດໝາຍໄວ້.
ລາຍງານໂດຍ: ຊ.ສີສັນ